यसपालीको गाईजात्रामा जितु र दमन मिले, माग्नेबुढा र धुर्मुस देखिएनन्

भदौ ३,काठमाडौं । हरेक वर्षजस्तै यसपटकको गाईजात्रामा पनि हाँस्यव्यंग्य कलाकार आआफ्ना प्रस्तुति बोकेर हल पसिसकेका छन् । गाईजात्राको अघिल्लो दिन बिहीबारदेखि नै प्रज्ञा भवन कमलादीमा तीतेजिरे गाईजात्रा सुरु भएको थियो । अघिल्ला वर्षहरुमा कलाकारहरु दुई समूहमा बाँडिएर गाईजात्रे प्रस्तुति दिन्थे । तर यसपटक प्रज्ञा भवनमा मात्रै गाईजात्रा महोत्सव आयोजना गरिएको छ । ‘यसपटक राष्ट्रिय सहमतिको गाईजात्रा कार्यक्रम भएको छ’ युवा हाँस्यव्यंग्य कलाकार राजा राजेन्द्र पोखरेलले ठट्यौली पारामा भन्नुभयो, ‘हामी सबै एकै ठाउँमा अटाएका छौं ।’

जितु नेपाल र दमन रुपाखेतीको पुरानो जोडीको पुनर्मिलन भएपछि यसवर्ष एउटै मञ्चमा गाईजात्रा महोत्सव गर्न कलाकारहरु सफल भएका हुन् । पोहोर, परार दिपकराज गिरी, जितु नेपाल, शिवहरी पौडेल एकातिर हुँदा दमन रुपाखेतीको समूह अर्कोतिर हुन्थे । तर १० वर्षपछि जितु र दमनले जोडी भएर काम थालेका छन् । ‘उहाँहरु मिलेपछि बलियो प्रतिपक्षी देखिएनन्’ कलाकार पोखरेलले भन्नुभयो ।

जितु र दमनको जोडी देखिएपनि यसपालीको गाईजात्रामा अर्को जोडी केदार घिमिरे माग्ने बुढा र सिताराम कट्टेल धुर्मुसको जोडीलाई भने देखिंदैन । घिमिरे बिरामी छन् भने कट्टेल भूकम्प पीडितको घर बनाउने काममा व्यस्त छन् ।

यसपाली पनि कलाकारहरुले समसामयिक राजनीतिक तथा सामाजिक घटनाक्रमलाई व्यंग्य गर्दै गाईजात्रे मसला पस्केका छन् । दिपकराज गिरीको समूहले नक्कली डाक्टर अख्तियारको हस्तक्षेप, जितु र दमनले मापसे चेकिङ, शिवहरि पौडेल र किरण केसीले चीन र भारतसँगको सम्बन्धलाई आफ्नो प्रस्तुतिको विषय बनाएका छन् । 

अर्का लोकप्रिय कलाकार मनोज गजुरेलले अख्तियार प्रमुख लोकमान सिंह कार्कीको अटेरीपन र निरीह सभासदलाई व्यंग्य गरेका छन् । कार्यक्रम सञ्चालक समेत रहेका कलाकार राजा राजेन्द्र पोखरेलले नेताहरुलाई हाँस्यव्यंग्य सिरियल खेल्न आग्रह गरेका छन् ।

कलाकारहरुले खेलेको सिरियल टेलिभिजनमा नचलेपछि उनले नेताहरुलाई सिरियल खेल्न आग्रह गरेका हुन् । प्रज्ञा भवनको गाईजात्रा १८ गतेसम्म चल्नेछ ।